மக்கள் பாதுகாப்புடன் இருப்பது தான் எனக்கு மகிழ்ச்சி; கட்டாயம் முகக்கவசம் அணிய வேண்டும் - முதல்வர் மு.க.ஸ்டாலின்

முகக்கவசம் மட்டுமே நமக்கு கேடயம், அதனால் கட்டாயம் முகக்கவசம் அணிய வேண்டும் என முதல்வர் மு.க.ஸ்டாலின் கூறியுள்ளார்.

நாடு முழுவதும் கொரோனா பரவலை தடுக்க 15 - 18 வயது வரையுள்ள சிறுவர், சிறுமிகளுக்கு கொரோனா தடுப்பூசி செலுத்தும் பணி ஜனவரி 3-ந் தேதி முதல் தொடங்கப்படும் என்று அறிவிக்கப்பட்டுள்ளது.

அதன்படி, சென்னை சைதாப்பேட்டையில் உள்ள பெண்கள் மேல்நிலைப்பள்ளியில் 15 முதல் 18 வயது சிறுவர்களுக்கு கொரோனா தடுப்பூசி செலுத்தும் திட்டத்தை முதல்வர் மு.க.ஸ்டாலின் தொடங்கி வைத்தார். முன்னதாக அவர் பேசியதாவது,

*  ஒமைக்ரான் தற்போது மிரட்ட தொடங்கியிருக்கிறது. கொரோனாவில் இருந்து மீண்டு வந்த நமக்கு ஒமைக்ரானால் தடை ஏற்படும் சூழல் ஏற்பட்டுள்ளது.

*  ஒமைக்ரானில் இருந்து பாதுகாத்துக்கொள்ள விழிப்புடன் இருக்க வேண்டும்.

*  முந்தை வைரஸை விட ஒமைக்ரான் நோய் தாக்கம் குறைவு தான்.

*  ஒமைக்ரான் நோய் தாக்கம் குறைவாக இருந்தாலும் பரவல் வேகம் அதிகம்.

* முகக்கவசம் மட்டுமே நமக்கு கேடயம், அதனால் கட்டாயம் முகக்கவசம் அணிய வேண்டும்.

* சென்னையில் நாளுக்கு நாள் கொரோனா தொற்று அதிகரித்து வருகிறது.

*அனைவரும் பாதுகாப்புடன் இருப்பது தான் எனக்கு மகிழ்ச்சி.

* தடுப்பூசிகள், நோய் எதிர்ப்பை தொடர்ந்து அளித்து வருகிறது. தடுப்பூசி செலுத்தி கொண்டால் இறப்பு விகிதம் குறைவு.

* தடுப்பூசி செலுத்திக்கொள்ளுங்கள் என அன்போடு, பணிவோடு, கெஞ்சி மன்றாடி கேட்டுக்கொள்கிறேன், புதிய வைரஸ் தாக்கத்தை தடுத்து நிறுத்துவோம் என உறுதி ஏற்போம்.

* நோயில் இருந்து விடுபட்ட மாநிலம் என்ற பெயரை எடுக்கவேண்டும்; அதற்கு பொதுமக்கள் ஒத்துழைக்க வேண்டும்.

இவ்வாறு அவர் கூறினார்.