விஜய் கட்சிக்கு புதிய நெருக்கடி.. பகுஜன் சமாஜ் கட்சி நோட்டீஸ்

 
BSP - TVK

5 நாட்களுக்குள் கட்சி கொடியில் உள்ள யானை படத்தை நீக்காவிட்டால் சட்ட நடவடிக்கை எடுக்கப்படும் என நோட்டீஸ் அனுப்பப்பட்டுள்ளது.

தமிழக வெற்றிக் கழகம் என்ற அரசியல் கட்சியை கடந்த பிப்ரவரி மாதம் நடிகர் விஜய் தொடங்கி வைத்தார். அவர் வரும் 2026-ம் ஆண்டு நடக்கும் தமிழ்நாடு சட்டமன்ற தேர்தலில் தனது கட்சி போட்டியிடும் என தெரிவித்துள்ளார். இந்த நிலையில் விஜய் கட்சி சார்பில் பிரம்மாண்ட மாநாடு ஒன்று நடத்த திட்டமிடப்பட்டு வருகிறது. அதற்கு முறையான அனுமதி கிடைக்கப்படவில்லை என்ற தகவல்களும் வருகின்றன. இந்த நிலையில் கடந்த ஆகஸ்ட் மாதம் 22-ம் தேதி சென்னை பனையூரில் உள்ள கட்சி அலுவலகத்தில் கட்சிக்கான கொடியையும் கொடி பாடலையும் நடிகர் விஜய் அறிமுகப்படுத்தினார்.

TVK

அந்த கட்சிக் கொடியில் சிவப்பு மற்றும் மஞ்சள் நிறங்கள் இடம் பெற்றுள்ளன. மேலும் இரண்டு யானைகளும் வெற்றியைக் குறிக்கும் வகையில் வாகைப்பூவும் இடம்பெற்றிருந்தன. இதற்கிடையே தேசிய கட்சியான பகுஜன் சமாஜ் கட்சியின் சின்னமான யானை படத்தை தவெக கொடியில் பயன்படுத்துவது தேர்தல் விதியின்படி தவறானது என பகுஜன் சமாஜ் கட்சியின் சார்பில் அறிவிக்கப்பட்டது சர்ச்சையை ஏற்படுத்தி இருந்தது. தமிழக வெற்றிக்கழகத்தின் கொடி தொடர்பாக பகுஜன் சமாஜ் புகார் அளித்திருந்த நிலையில் இந்திய தேர்தல் ஆணையம் அதற்கு பதில் அளித்து இருந்தது.  

அதில், “இந்திய தேர்தல் ஆணையத்தில் பதிவு செய்யப்பட்ட தமிழக வெற்றிக்கழகம் தற்காலிக சின்னம் கொடுக்கப்பட்டுள்ளது. தேர்தலுக்கு முன்பு தான் ஒரு கட்சி விண்ணபித்து சின்னத்தை பெற முடியும். எனவே ஒரு கட்சியின் கொடிக்கு நாங்கள் ஒப்புதல், அங்கீகாரம் வழங்குவது இல்லை. கொடி விவகாரத்தில் தேர்தல் ஆணையம் தலையிடாது. ஒரு கட்சிக்கு கொடி இருக்கிறது என்றால் அந்த கட்சி தான் பொறுப்பு. மற்ற கட்சிகளின் சின்னத்தை விதிமீறாமல் கொடி இருக்க வேண்டும்” என இந்திய தேர்தல் ஆணையம் கூறி இருந்தது.  

TVK

இந்த நிலையில் தவெக தலைவர் விஜய்க்கு பகுஜன் சமாஜ் கட்சியின் வழக்கறிஞர் நோட்டீஸ் அனுப்பி உள்ளார். அதில், “தேர்தல் ஆணையத்தால் அங்கீகரிக்கப்பட்ட பகுஜன் சமாஜ் கட்சியின் சின்னமாக யானை உள்ளது. தவெக கொடியில் உள்ள யானை சின்னம், தேர்தல் ஆணைய விதிமுறையை நீக்குவதாக உள்ளது. நோட்டீசை சட்டமுறை அறிவிப்பாக கருதி சின்னத்தில் யானை படத்தை நீக்குமாறு அறுவுறுத்துகிறோம். 5 நாட்களுக்குள் கட்சி கொடியில் உள்ள யானை படத்தை நீக்காவிட்டால் சட்ட நடவடிக்கை எடுக்கப்படும்.” என எச்சரிக்கப்பட்டுள்ளது. 

From around the web