வரும் 4-ம் தேதி அனைத்து பள்ளிகளுக்கும் விடுமுறை... புதுச்சேரி அரசு அறிவிப்பு

புயல் எச்சரிக்கை காரணமாக வரும் 4-ம் தேதி புதுச்சேரி மாநிலத்திற்கு விடுமுறை அறிவிக்கப்பட்டுள்ளது.

புதுவை மற்றும் காரைக்கால் பகுதிகளில் இடிமின்னலுடன் தொடர்ந்து மழை பெய்து வருகிறது. தென்மேற்கு வங்கக்கடலில் நிலைகொண்டிருந்த காற்றழுத்த தாழ்வு மண்டலம் மேற்கு - வடமேற்கு திசையில் நகர்ந்து இன்று ஆழ்ந்த காற்றழுத்த தாழ்வு மண்டலமாக வலுப்பெற்றுள்ளது. இந்த ஆழ்ந்த காற்றழுத்த தாழ்வு மண்டலம் அடுத்த 24 மணி நேரத்தில் புயலாக வலுப்பெறக்கூடும். இந்த புயலுக்கு ‘மிக்ஜம்’ என பெயரிடப்பட்டுள்ளது.

இந்த புயல் வரும் 4-ம் தேதி வட தமிழ்நாடு கடலோர பகுதிக்கு நகர்ந்து 5-ம் தேதி நெல்லூர் - மசூலிப்பட்டினம் இடையே கரையை கடக்கும் என சென்னை வானிலை ஆய்வு மையம் தெரிவித்துள்ளது. மேலும் சென்னை, செங்கல்பட்டு, காஞ்சிபுரம், திருவள்ளூர் ஆகிய 4 மாவட்டங்களுக்கும் நாளை மிக கனமழை எச்சரிக்கை விடப்பட்டுள்ளது.

இந்நிலையில், புயல் எச்சரிக்கை காரணமாக புதுச்சேரி, காரைக்கால், ஏனாம் ஆகிய பகுதிகளில் வரும் 4-ம் தேதி பள்ளிகளுக்கு விடுமுறை என கல்வித்துறை இயக்குநர் அறிவித்துள்ளார்.

இந்த நிலையில் மிக்ஜம் புயல் எச்சரிக்கை காரணமாக நாடு முழுவதும் 142 ரயில்கள் ரத்து செய்யப்பட்டுள்ளன. நாளை முதல் 7-ம் தேதி வரை பல்வேறு  வழித்தடங்களில் இயக்கப்படும் ரயில்கள் ரத்து செய்யப்பட்டுள்ளன.