விடாமுயற்சி ரிலீஸ் எப்போது? ஆக்ஷன் கிங் அர்ஜூனே தந்த அப்டேட்!
நடிகர் அஜித்தின் ‘விடாமுயற்சி’ படம் எப்போது ரிலீசாகும் என்று அப்படத்தின் வில்லன் நடிகர் அர்ஜூன் தெரிவித்துள்ளார்.
‘துணிவு’ படத்தின் வெற்றியை தொடர்ந்து மகிழ் திருமேனி இயக்கத்தில் ‘விடாமுயற்சி’ படத்தில் நடிகர் அஜித் நடித்து வருகிறார். இப்படத்தில் அவருக்கு ஜோடியாக திரிஷா நடிக்கிறார். அஜித்தின் 62-வது ஆக்ஷன் படமாக இது உருவாகி வருகிறது. இப்படத்தில் வில்லனாக ஆக்ஷன் கிங் அர்ஜுன் மற்றும் ஆரவ் நடிக்கின்றனர் இவர்களுடன் நடிகைகள் ரெஜினா கசாண்ட்ரா, பிரியா பவானி ஷங்கர் உள்ளிட்ட பலர் நடித்து வருகின்றனர். இப்படத்தை லைகா நிறுவனம் சார்பில் சுபாஸ்கரன் தயாரிக்கிறார். அனிருத் இசையமைக்கிறார்.
இதன் படப்பிடிப்புகள் கடந்த ஆண்டு அக்டோபர் மாதம் அஜர்பைஜானில் தொடங்கியது. அதன் பின் வடமாநிலம் உள்ளிட்ட பல்வேறு இடங்களில் இதன் படப்பிடிப்பு நடந்து வந்தது. சிறு இடைவேளைக்கு பின் நடிகர் அஜித் குமாரின் ‘விடாமுயற்சி’ படப்பிடிப்பு அஜர்பைஜானில் மீண்டும் தொடங்கியது. படத்தின் சண்டை காட்சிகள் படமாக்கப்படும் வீடியோவை பகிர்ந்து அஜித்குமாரின் மேலாளர் சுரேஷ் சந்திரா அப்டேட் கொடுத்தார்.
இதனிடையே, குட் பேட் அக்லி படத்தின் படப்பிடிப்பு விறுவிறுப்பாக நடைபெற்று வருகிறது. இந்த சூழலில், விடாமுயற்சி படம் தீபாவளிக்கு ரிலீஸ் என்று கூறப்பட்டு வந்த நிலையில், பொங்கலுக்கு படம் வெளியாகும் என்று தகவல் வெளியானது.
இந்த சூழலில், துபாயில் நடைபெற்ற சைமா விருது வழங்கும் விழாவில் நடிகர் அர்ஜூன் பங்கேற்றார், அவருக்கு லியோ படத்தில் நடித்ததற்காக சிறந்த வில்லன் விருது வழங்கப்பட்டது. அந்த நிகழ்ச்சியில் பேசிய நடிகர் அர்ஜூன், விடாமுயற்சி படத்தின் கிளைமேக்ஸ் காட்சியை தற்போதுதான் படமாக்கினோம். இந்த படம் இன்னும் 2 அல்லது 3 மாதத்தில் ரிலீஸ் ஆகும் என்றார். இதைக்கேட்ட ரசிகர்கள் ஆர்ப்பரித்தனர்.
அர்ஜூன் கூறியதன்படி, விடாமுயற்சி படம் வரும் டிசம்பர் மாதம் வெளியாக வாய்ப்புகள் இருப்பதாக கூறப்படுகிறது. லைகா ப்ரொடக்ஷன்ஸ் தயாரிப்பில் வேட்டையன் படம் வரும் அக்டோபர் 10ம் தேதி ரிலீசாக உள்ளது என்பது குறிப்பிடத்தக்கது.