வெளியானது ‘ஜெயிலர்’ படத்தின் இரண்டாவது பாடல்..! ரசிகர்கள் உற்சாகம்

ரஜினிகாந்த் நடிக்கும் ‘ஜெயிலர்’ படத்தின் இரண்டாவது பாடல் வெளியாகி உள்ளது.

‘அண்ணாத்த’ படத்திற்கு பிறகு ரஜினிகாந்த் நடித்துள்ள படம் ‘ஜெயிலர்’. இந்தப் படத்தை கோலமாவு கோகிலா, டாக்டர், பீஸ்ட் படங்களை இயக்கிய நெல்சன் திலீப்குமார் இயக்கியுள்ளார். இந்தப் படத்தில் ரஜினிகாந்திற்கு ஜோடியாக தமன்னா நடித்துள்ளார். இந்தப் படத்தில், மலையாள நடிகர் மோகன்லால், கன்னட நடிகர் சிவராஜ்குமார் மற்றும் பிரியங்கா மோகன், ரம்யா கிருஷ்ணன், யோகிபாபு, வசந்த் ரவி, விநாயகன் ஆகியோரும் முக்கிய கதாபாத்திரத்தில் நடிக்கின்றனர்.

சன் பிக்சர்ஸ் தயாரித்துள்ள இந்தப் படத்துக்கு விஜய் கார்த்திக் கண்ணன் ஒளிப்பதிவு செய்ய, அனிருத் இசையமைக்கிறார். முத்துவேல் பாண்டியன் என்ற வேடத்தில் ரஜினி நடித்துள்ளார். அதிரடி சண்டை படமாக தயாராகி வரும் இந்தப் படம், வரும் ஆகஸ்ட் 10-ம் தேதி வெளியாகும் என படக்குழு அறிவித்துள்ளது.

இந்த நிலையில், ஜெயிலர் படத்தின் முதல் பாடல் கடந்த 6-ம் தேதி வெளியானது. அனிருத் இசையில் அருண் ராஜா காமராஜ் எழுதியுள்ள காவாலா என்ற பாடல் தற்போது இணையத்தில் ட்ரெண்டாகி வருகிறது. இந்த பாடல் குறித்து விமர்சனங்கள் அதிகம் இருந்தாலும் அதே அளவுக்கு ரசிகர்கள் மத்தியில் வரவேற்பை பெறவும் தவறவில்லை.

இந்த நிலையில் இப்படத்தின் இரண்டாவது பாடலான 'ஹுக்கும் - தலைவர் அலப்பறை' என்ற பாடல் இன்று (ஜூலை 17) வெளியாகும் என்று அறிவிக்கப்பட்டிருந்தது. அதன்படி இந்த பாடலின் லிரிக் வீடியோ தற்போது வெளியாகி உள்ளது. சூப்பர் சுப்பு எழுதியுள்ள இந்த பாடலை இசையமைப்பாளர் அனிருத் பாடியுள்ளார். இந்த பாடல் தற்போது இணையத்தில் வைரலாகி வருகிறது.