அமேசானில் ஆர்டர் செய்தது ஹெட்செட்.. வந்தது டாபர் ரெட் டூத் பேஸ்ட்.. அதிர்ச்சி வீடியோ!
அமேசானில் ஒரு பயனருக்கு ஆர்டர் செய்த சோனி ஹெட்ஃபோனுக்கு பதிலாக டூத்பேஸ்ட் பார்சலில் அனுப்பி வைக்கப்பட்டுள்ள சம்பவம் அதிர்ச்சியை ஏற்படுத்தியுள்ளது.
ஆன்லைனில் பொருட்களை வாங்குவது தற்காலத்தில் சாதாரணமான செயலாகி வருகிறது. கடைவீதிக்குச் சென்று ஆராய்ந்து துணி, பொருட்களை வாங்குவதற்குப் பதில் வீட்டில் இருந்தபடியே ஸ்மார்ட்போன் மூலம் ஆன்லைனில் வாங்குவது எளிமையாகிவிட்டது. உள்ளங்கைக்குள் அடங்கும் ஒரு ஸ்மார்ட் போனில் அமேசான் மற்றும் பிளிப்கார்ட் போன்ற செயலிகள் மூலம் பொருட்களை இந்தியாவின் எந்த மூலையிலிருந்தும் பெற முடிகிறது.
ஆனால் இதில் இருக்கும் மிகப்பெரிய சிக்கல் என்னவென்றால் ஆர்டர் செய்த பொருளுக்கு மாற்றாக வேறொரு பொருள் அனுப்பி வைக்கப்படுவது ஆன்லைன் ஷாப்பிங் மீதான நம்பகத் தன்மையை கேள்விக்கு உள்ளாக்குகிறது. சமீபத்தில் ஒரு பயனருக்கு ஆர்டர் செய்த சோனி ஹெட்ஃபோனுக்கு பதிலாக டூத்பேஸ்ட் பார்சலில் அனுப்பி வைக்கப்பட்டுள்ளது.
இதனை பார்த்து அந்த வாடிக்கையாளர் கடும் அதிர்ச்சியடைந்தார். 20 ஆயிரம் ரூபாய் மதிப்பிலான சோனி ஹெட்போனை ஆர்டர் செய்து காத்திருந்தவருக்கு பார்சலில் டூத்பேஸ்ட் இருந்தால் எப்படி இருக்கும்? என யோசித்து பாருங்கள். இதனை முழுமையாக வீடியோவாக அவர் பதிவு செய்து எக்ஸ் தளத்தில் பதிவேற்றி இருக்கிறார். அந்த வீடியோவில் பார்சல் வந்ததும் மகிழ்ச்சியாக எடுத்துச் செல்லும் அவர் பின் பிரிக்கிறார்.
முழுமையாக பார்சலை பிரித்து பார்க்கும்போது டூத்பேஸ்ட் இருக்கிறது. இதனை அவரால் நம்பவே முடியவில்லை. உண்மையில், அவர் அமேசானிலிருந்து ரூ.19,990 மதிப்புள்ள Sony XB910N வயர்லெஸ் ஹெட்ஃபோனை ஆர்டர் செய்திருக்கிறார்.
அமேசானில் இதுபோன்ற தவறுகள் இதற்கு முன்பும் நடத்திருக்கின்றன. ஒரு லட்சம் ரூபாய் மதிப்பிலான டிவியை ஆர்டர் செய்தவருக்கு வேறொரு பிராண்ட் டிவி சென்றது. இந்த சம்பவங்கள் எல்லாம் ஆன்லைன் ஷாப்பிங் மீதான நம்பகத் தன்மையை மக்களிடையே கேள்விக்குள்ளாக்கின்றன.