வி.பி.துரைசாமியால் திமுகவிற்கான வாக்குகள் பாதிக்குமா? பேசப்படும் அளவிற்கு பாஜக-வில் வளர்வாரா?

அதாவது வி.பி.துரைசாமி அருந்ததியர் என்பதால், தலித் என்பதால் அவமதிக்கப்படுகிறார், புறக்கணிக்கப்பட்டார் என்ற வாதங்கள் எல்லாம் திமுகவுக்கு எதிரான விஷமிகளால் பதியப்படும், பரப்பப்படும் கருத்துகள். இதில் துளியும் உண்மை இல்லை.

அதே போல வி.பி.துரைசாமியின் இந்த சம்பவத்தை, “இவர்களுக்கு நன்றி இல்லை, நன்றி கெட்டவர்கள்” என்று தலித்களுக்கு எதிராக கட்டமைக்கப்படும், பரப்பப்படும் செயல்களும் அதே விஷமத்தனமானதே.

இப்போ கேள்விக்குள் வருகிறேன். காலகாலமாக அருந்ததியர் ஓட்டுகள் என்றாலே அது ‘அதிமுக’விற்குதான் என்ற ஒரு கருத்து எப்பவும் இங்கே நிலவும். அது உண்மைதான் எம்.ஜி.ஆருக்காக அந்த சமூகத்தின் பெரும்பான்மை வாக்குகள் அதிமுகவுக்கு சென்றதுதான். ஆனால் கலைஞர் கொண்டுவந்த அருந்ததியர் சமூகத்திற்கான இடஒதுக்கீட்டிற்கு பிறகு, அருந்ததியர் சமூகத்தின் வளர்ச்சிக்கென்று பிரத்தியேகமாக எழுந்த இயக்கங்களை அடுத்து இந்த நிலை இப்போது மாறி பெரும்பான்மை அருந்ததியர் சமூக வாக்குகள் திமுகவை நோக்கி வந்திருக்கிறது.

இடஒதுக்கீடு தந்த கலைஞருக்கு பகுத்தறிவாலையம் கட்டுவது, தங்கள் குழந்தைகளுக்கு அன்பழகன், கருணாநிதி என்று பெயர்களை சூட்டுவது என்பதிலிருந்து அருந்ததியர் சமூகத்தினரின் திமுக சார்பை உணர்ந்துகொள்ளலாம்.

அதுமட்டுமின்றி அதியமானின் ஆதித்தமிழர் பேரவை, கு.ஜக்கையனின் ஆதித்தமிழர் கட்சி, நாகை.திருவள்ளுவனின் தமிழ்புலிகள் கட்சி என்று அனைத்து அருந்ததியர் இயக்கங்களும் கடந்த பாராளுமன்ற தேர்தலில் திமுகவை நேரடியாக ஆதரித்து களம் கண்டன. வரும் சட்டமன்ற தேர்தலிலும் இது தொடரும் என்று நம்புகிறேன். அதுமட்டுமின்றி பார்ப்பனியம், இந்துத்துவத்திற்கு எதிரான அருந்ததியர் சமூகம் சார்ந்த முற்போக்குவாதிகளும், அம்பேத்கரிஸ்ட்களும் நேரடியாக, வெளிப்படையாக இன்று திமுகவை ஆதரிக்கின்றனர் என்பதையும் பதிவு செய்கிறேன்.

ஆக, வி.பி.துரைசாமியின் பாஜக விஜயத்தால் அருந்ததியர் சமூகத்தினருக்கும் பாதிப்பில்லை, திமுகவிற்கும் பாதிப்பில்லை.