அரசியல் கட்சித் தொடங்கிய நடிகர் விஜய்.. வாழ்த்து கூறிய ரஜினிகாந்த்!

நடிகர் விஜய் ‘தமிழக வெற்றி கழகம’ என்ற பெயரில் அரசியல் கட்சி தொடங்கியதற்கு நடிகர் ரஜினிகாந்த் வாழ்த்து தெரிவித்துள்ளார்.

தமிழ் திரையுலகில் முன்னணி நடிகர் வலம் வருபவர் நடிகர் விஜய். இவருக்கு தமிழ்நாடு மட்டுமின்றி உலகம் முழுவதும் ரசிகர்கள் கொண்டுள்ளார். இவர், விஜய் மக்கள் இயக்கம் சார்பில் தொடர்சியாக பல நலத்திட்ட உதவிகளை செய்து வருகிறார். சில தினங்களுக்கு முன்பு உலக பட்டினி தினத்தை முன்னிட்டு தமிழ்நாட்டில் உள்ள 234 தொகுதிகளிலும் ஏழை எளியோருக்கு உணவு வழங்கப்பட்டது. இந்த நிகழ்வு விஜய்யின் அரசியல் நகர்வாக பார்க்கப்பட்டது.

இந்த நிலையில், நடிகர் விஜய் ‘தமிழக வெற்றி கழகம்’ என்ற புதிய கட்சியை தொடங்கியுள்ளார். தனது கட்சியின் பெயரை டெல்லி தேர்தல் ஆணையத்தில் பதிவு செய்துள்ளார். இதை அவரே தனது அதிகாரப்பூர்வ எக்ஸ் பக்கத்தில் அறிக்கையாக பதிவிட்டிருந்தார். விஜய் அரசியலுக்கு வந்ததும் அவரது ரசிகர்கள் மற்றும் ரசிகர் மன்ற நிர்வாகிகள் பட்டாசு வெடித்தும், இனிப்புகளை வழங்கியும் கொண்டாடினர்.

இதனை தொடர்ந்து விஜய்யின் அரசியல் பிரவேசத்திற்கு முதல்வர் மு.க.ஸ்டாலின், மக்கள் நீதி மையம்  கட்சித் தலைவர் கமல்ஹாசன், நாம் தமிழர் கட்சித் தலைவர் சீமான், பாஜக மாநில தலைவர் அண்ணாமலை உள்ளிட்ட முக்கிய அரசியல் கட்சி தலைவர்கள் வாழ்த்து தெரிவித்தனர்.