வங்கி அதிகாரி வீட்டில் நூதன முறையில் கொள்ளையடித்த கும்பல் - போலீஸ் எச்சரிக்கை

திருச்சியில் வங்கி அதிகாரி வீட்டின் பூட்டை உடைத்து ரூ.5 லட்சம் மதிப்பு நகைகள், மடிக்கணினி கொள்ளையடிக்கப்பட்டது.

திருச்சி பொன்னகர் நியூசெல்வநகரை சேர்ந்தவர் லெட்சுமன் (வயது 33). இவர் வங்கி ஒன்றில் உதவி மேலாளராக பணியாற்றி வருகிறார். இவருடைய மனைவி வனிதா. இவர்கள் கடந்த 8-ந் தேதி வீட்டை பூட்டி விட்டு உறவினர் வீட்டு விசேஷத்துக்காக குடும்பத்துடன் பெங்களூருக்கு சென்று இருந்தனர். அங்கு நிகழ்ச்சியை முடித்து கொண்டு இன்று காலை வீடு திரும்பினர்.

அப்போது வீட்டின் முன்பக்க கேட்டில் இருந்த பூட்டு உடைந்து கிடந்தது. வீட்டினுள் மரக்கதவு நெம்பி திறக்கப்பட்டு இருந்தது. இதை கண்டு அதிர்ச்சி அடைந்த லெட்சுமன் வீட்டினுள் புகுந்து அறையில் பார்த்தார்.

அங்கு லாக்கரில் இருந்த ரூ.5 லட்சம் மதிப்புள்ள 13 சவரன் தங்க நகைகள், வெள்ளிக்கொலுசு, பிரேஸ்லெட், மடிக்கணினி, ஹார்ட்டிஸ்க், பென்டிரைவ், ரூ.17 ஆயிரம் ஆகியவை கொள்ளைபோய் இருந்தது.

உடனே இது குறித்து செசன்ஸ் நீதிமன்றம் போலீசாருக்கு தகவல் கொடுத்தனர். போலீஸ் உதவி கமிஷனர் அஜய்தங்கம் தலைமையிலான போலீசார் சம்பவ இடத்துக்கு வந்து விசாரணை நடத்தினார்கள்.

இது குறித்து செசன்ஸ் நீதிமன்றம் போலீசார் வழக்குப்பதிவு செய்து கொள்ளையில் ஈடுபட்ட மர்ம நபர்களை அந்தபகுதியில் பொருத்தப்பட்டுள்ள கண்காணிப்பு கேமராக்களை ஆய்வு செய்து தேடி வருகிறார்கள்.

மேலும் கொள்ளை நடந்த லெட்சுமன் வீட்டின் முன்புறம் இருந்த இரும்பு கேட்டில் சிறிய ஸ்டிக்கர் ஒட்டப்பட்டு இருந்தது. இந்த ஸ்டிக்கரை கண்டு போலீசார் அதிர்ச்சி அடைந்தனர்.

கொள்ளையடிக்க திட்டமிட்ட வீட்டில் ஒருவேளை ஆட்கள் இருந்தால் இரும்பு கேட்டை திறக்கும்போது, இருகதவுகளுடன் இணைத்து ஒட்டப்பட்ட ஸ்டிக்கர் கிழிந்துவிடும். இதன் மூலம் அந்த வீட்டில் ஆட்கள் இருக்கிறார்கள் என்பதை தெரிந்து கொள்ளலாம். ஆனால் பல நாட்களாக ஸ்டிக்கர் கிழியாமல் இருந்தால் அந்த வீட்டில் ஆட்கள் இல்லை என்பதை அறிந்து கைவரிசை காட்டி விடுகிறார்கள்.

சமீபகாலமாக கொள்ளைகும்பல் இதுபோன்ற நூதனமுறையை கையாண்டு வருகிறார்கள். ஆகவே பூட்டி இருக்கும் வீடுகளின் முன்பு சந்தேகப்படும்படியாக ஏதாவது ஸ்டிக்கர் ஒட்டப்பட்டு இருந்தாலோ, குறியீடு இருந்தாலோ காவல்துறைக்கு தகவல் தெரிவிக்க வேண்டும் என்று போலீசார் வேண்டுகோள் விடுத்துள்ளனர்.