சென்னையில் 3 லட்சத்து 65 ஆயிரம் பேர் வீட்டிலேயே தனிமையில்!!
சென்னையில் 3 லட்சத்து 65 ஆயிரம் பேர் வீட்டிலேயே தனிமைப் படுத்தப்பட்டுள்ளதாக மாநகராட்சி கமிஷனர் கோ.பிரகாஷ் தெரிவித்துள்ளார்.
“சென்னையில் வீடு, வீடாக நடத்தப்பட்டு வரும் காய்ச்சல் அறிகுறி கண்டறியப்படும் பரிசோதனை தீவிரப்படுத்தப்பட்டுள்ளது. இதுவரையிலும் 7 லட்சத்துக்கும் மேற்பட்டோருக்கு சென்னையில் காய்ச்சல் பரிசோதனை செய்யப்பட்டுள்ளது. இவர்களில் 3 லட்சத்து 65 ஆயிரத்து 113 பேர் தனிமைப்படுத்தப்பட்டுள்ளனர்.
தண்டையார்பேட்டை மண்டலத்தின் குடிசைப் பகுதிகளில் கொரோனா பாதிப்பு 10 சதவீதமாக உள்ளது. தொண்டு நிறுவனங்கள் மூலமாக விழிப்புணர்வு ஏற்படுத்தப்பட்டு வருகிறது. இலவசமாக மறுபயன்பாட்டுடன் கூடிய முககவசங்கள் வழங்கப்படுகிறது.
தண்டையார் மண்டலத்தில் உள்ள 2 ஆயிரத்து 995 தெருக்களில், கடந்த 14 நாட்களாக 363 தெருக்களில் ஒரு பாதிப்பு ஏற்படவில்லை. மேலும் இதுவரையிலும் ஒரு பாதிப்பு கூட இல்லாத 157 தெருக்களில் ஒரு சிலருக்கு கொரோனா தொற்று ஏற்பட்டுள்ளது.” என்று மாநகராட்சி கமிஷனர் கோ.பிரகாஷ் செய்தியாளர்களிடம் கூறினார்.